Nagpahanumdom ang Department of Education sa mga eskwelahan nga indi pagpahanugutan nga gamiton sang mga pulitiko ang graduation rites bilang venue agud nga makapangampanya.
Suno kay Ian Arnold Arnaez, public information officer sang DepEd Division of Negros Occidental, wala sang nagadumili sa mga politiko nga magtambong sa graduation ceremony ilabi na kun may anak ang mga ini nga magagraduate.
Ang ginadumilian lang amo ang paggamit sang graduation bilang platform sang mga politiko ukon nagaplano magkandidato agud nga mangampanya ilabi na nga nagahilapit na ang Barangay kag Sangguniang Kabataan elections.
Suno diri, kun may parte ang punong barangay ukon iban pa nga official sa graduation ceremony, dapat nga magstick ang mga ini sa ila nga katungdanan sa programa.
Bangud sini, ginaremind ang mga school principal nga kun mag-imbitar sang pulitiko sa graduation, iadvise ang mga ini nga indi paggamiton ang programa para sa pagpangampanya.
Nagalaom naman ini nga respetuhon sang mga politiko ang katuyuan sang programa para sa mga estudyante.
Magadepende naman sa eskwelahan kun sa diin hiwaton ang graduation bangud indi tanan ang may covered gym.
Suno diri, sarang mapatigayon ang rites sa available nga lugar basta ini ang solemn kag indi mabasa ukon mainitan ang mga nagatambong.
