Ginpahayag sang public information officer sang Department of Education (DepEd) Region 6 nga 13 ka mga school divisions sa Western Visayas ang nagpatigayon sang suspension sa in-person classes.
Sa interview sang Bombo Radyo Bacolod kay Hernani Escullar Jr., gin-athag sini nga ang mga eskwelahan ang gilayon naman nga nagashift sa alternative delivery mode.
As of April 2, 3:00pm data, nagadangat sa 1,150 nga mga eskwelahan ang nagpatigayon sang suspension humalin Abril 1 tubtob Abril 2, samtang ginatipon pa nila gikan sa mga Disaster Risk Reduction Management Offices sa tagsa ka mga banwa kag ciudad ang data sang mga class suspension sang Abril 3.
Suno diri, kapin 11 nga mga school’s division ang nagsuspend sang face-to-face classes santo sa deklarasyon sang mga Local Chief Executive.
Samtang sa DepEd Diviion of Guimaras kag San Carlos, mismo ang mga school heads na ang nagdesisyon nga magshift sa alternative delivery mode bangod nakita nga indi na conducise sa mga kabataan ang face-to-face classes sa mga classrooms.
Nakadepende naman sa arrangement sang mga school principal kun ano nga sahi sang alternative delivery mode ang ipatuman.
Paathag lamang ni Escullar nga ang importante lamang nga may-ara sang mapreparar nga instructional materials kaangay sang modules.
Ginapakamaayo sini nga idul-ong sang mga manunudlo ang mga modules sa buluthuan, nga mahimo naman nga makuha sang mga estudyante sa kaagahon samtang indi pa masakit ang silak sang adlaw.
Panindugan sini nga prayoridad sang DepEd nga maprotektahan ang mga learners kasubong man ang mga school personnel.
Nagakoordinar man ang mga ini sa mga local government units (LGUs) bangod ang tagsa ka mga DRRM Offices amo ang maidid nga nagmonitor sa sitwasyon sang tagsa ka mga Barangay, kag nalakip naman diri ang mga eskwelahan.
Sila ang nagakoordinar man sa mga Local Health Authorities kun sa diin ang guidelines gikan sa mga ini man ang basehan sa mga implementasyon sa mga buluthuan.
