Naghatag sang pahanumdom ang tagpamaba sang Department of Education division of Negros Occidental sa mga manunudlo, estudyante, kag ginikanan karun nga maulanon ang panahon.
Sa interview sang Bombo Radyo Bacolod kay Ian Arnold Arnaez, prayoridad nila ang safety sang tanan, gani bisan wala sang ginapatuman nga suspension panugyan sini nga indi na lamang pa-eskwelahon ang kabataan kun peligroso ang alagyan padulong sa buluthuan.
Partikular na sa mga nabukid nga lugar, ukon mga malapit sa suba, nga may mataas nga risgo sang pagbaha, landslide kag madanlog ang duta, panugyan ni Arnaez nga temprano pa nga ipahibalo sa manunudlo nga indi makasulod sa klase ang kabataan.
Pasalig sini nga may ara man sang nakapreparar nga modules nga sarang magamit sang kabataan sa pagtuon.
Panawagan man sini sa mga manunudlo nga temprano pa ihatag sa mga kabataan ang learning materials, agud may-ara na sang preparasyon sa mga hinali nga deklarasyon sang class suspension.
Suno diri, agud maseguro ang learning continuity, may-ara sang modules nga gintalana agud wala sang may mabilin, ilabi na nga alalangay ang calendara of activities sang DepEd, gani dungan man ang schedule sang exams kag pagtakop sang School Year.
Panugyan ni Arnaez sa mga ginikanan nga imonitor ang kabataan kag seguruhon nga nagasabat sa modules agud sila ang makacontribute man sa discussion sa pagresume sang face-to-face classes.
Dugang pa sini nga dapat bantayan ang kabataan bangod kun may kanselasyon sang klase, may mga kabataan nga wala man nagatinir sa balay, kag nagalagaw apisar nga may mga nagaluntad nga pagbinaha.
Pahanumdom sini nga likawan ang paghubog sa baha, agud malayo sa risgo sang leptospirosis.
Samtang…. ginpahayag sang spokesperson sang Department of Education-Negros Island Region nga ginahatagan sang importansya ang safety kag pagtoon sang mga estudyante sa tion sa pagdeklarar sang class suspension.
Mahibaluan nga nagpanawagan sa publiko si Education Secretary Sonny Angara nga indi gilayon mangayo sang suspension sang klase kun mag-ulan ilabi na kun indi lang man tuman kalain sang tyempo bangod ini maka-epekto sa pagtoon sa mga estudyante.
Sa interview sang Bombo Radyo Bacolod kay Almyr Ceazar Dequinia, ginakonsidar ang priority kag safety sang mga estuyante apang ginatan-aw man sang education secretary ang madula nga pagtoon sang kabataan.
Suno diri, may yara sang husto nga proseso sa pagsuspend sang klase kag dapat maintindihan ang legal nga basis sa pagdeklarar sini.
Apang ginalantaw man sini nga dapat ikonsiderar man nga mapadayon ang pagtoon sang mga estudyante.
Mensahe ni Dequiña, ang Local Government Unit kag DedEd nagakoordinar para sa safety sang bata kag sa padayon nga pagtoon nila.
