Nagpasalamat ang Department of Education Negros Occidental sa tanan nga nagsuporta agud nga matalunsay nga mapatigayon ang Palarong Panlalawigan ukon Provincial Meet subong nga tuig.
Nahibaluan nga may pinakamadamo nga nakuha nga medalya amo ang Area 8 ukon Negros Occidental Private School Sports Cultural Educational Association (NOPSSCEA) nga may kabug-usan nga 196 medals.
Sa interview sang Bombo Radyo kay Romeo Sison, provincial sports coordinator sang DepEd Division of Negros Occidental, madinalag-on kag smooth lang ang paghiwat sang Palarong Panlalawigan bisan may yara sang magagmay nga mga problema bangud na-manage man ini gilayon sang technical officials kag committee members.
Nagpasalamat naman ini nga luwas ang mga kabataan sa pihak sang tuman nga kainit nga panahon.
Sa karon, nagahanda na ang mga ini para sa pagsabak sa Western Visayas Regional Athletic Association Meet nga hiwaton sa Aklan sa Abril 24 tubtub 30.
Ginbuksan ang Palarong Panlalawigan 2023 sa Panaad Park and Stadium sang Marso 30 kag kahapon ginpatigayon ang closing ceremony.
