Nagalaom ang spokesperson sang Department of Education-Western Visayas nga mapabilin sang delegates sang Region 6 nga yara sa Rank 1 sa Palarong Pambansa, santo sa partial and unofficial medal tally as of 12 noon, August 3.
Sa karun, nagapanguna na ang Western Visayas nga may kabug-usan nga 50 medals nga ginalakipan sang 22 gold, 17 silver kag 11 bronze medals.
Sa interview sang Bombo Radyo Bacolod kay Hernani Escullar Jr., ang tanan nga mga atleta nga nagikan sa Western Visayas ang nagahimo sang ila nga masarangan agud nga malampawan ang record sang rehiyon sa nagliligad nga mga Palarong Pambansa.
Suno diri, ginsiguro man sang DepEd-Western Visayas nga mahatag ang suporta kag ang tanan nga kinahanglanon kaangay sang pagkaon, maayo nga tululugan kag seguridad sang mga atleta agud nga makatutok ang mga ini sa ila nga mga hampang.
Makita sa tanan nga mga atleta nga gatinguha agud nga makakuha sang medalya agud makuha ang kahigayunan nga mangin champion sa subong nga tuig nga Palarong Pambansa.
Ginpahayag man ni Escullar nga bangud malayo ang venue sang hampangan sang mga atleta temprano pa ang mga ini nagahalin sa ila accommodation agud indi maulihi sa hampang.
Madamo pa ang mga hampang sang mga atleta sang Western Visayas gani nagalaom ini nga magapabilin sa Rank 1 kag makuha ang championship sa Palarong Pambansa 2023.
