Naghatag sang pahanumdom ang Department of Health – Negros Island Region para sa pagsaulog sang Holy Week.
Sa interview sang Bombo Radyo Bacolod kay DOH-NIR Assistant Regional Director Adrian Hort Ramos, napaidalom na sila sa code white alert humalin sang Marso 30 tubtob Abril 6 para sa Semana Santa.
Suno diri, ang code white gina-issue kun may dalagko nga event kaangay sang Holy Week sa posibilidad nga may untoward incidents nga magluntad kag kinahanlan ang urgent nga pagresponder sang health care facilities.
Pahanumdom ni Ramos, subong nga ginasaulog ang Holy Week kag yara na ang summer season, dapat masecure gid nga mainom ang mga maintenance bangod madamo sang ginalauman nga magasaka ang blood pressure tuga sang mainit nga panahon.
Dugang pa sini, makatuga man sang dehydration ang grabe nga init amo nga mas maayo kun magbalon sang tubig, sunscreen, kalo, payong, kag isecure ang salakyan antes magbyahe.
Importante man suno kay Ramos nga nasecure na ang emergency numbers kag first aid kit para magamit sa tion sang emerhensya.
Sa may luyag naman magpartispar sa penetensya sa Semana Santa, halongan lamang nga indi ma-infect ang pilas ukon ma-tetanus.
Suno pa gid diri, indi pagpadugayan ang mga pagkaon kag likawan nga sulit-suliton nga initon kag kun maligo sa mga beaches, dapat may upod kag maayo ang kondisyon.
