Nagmando ang Department of Justice sang pagfile sang kaso batok sa utod kag ginaalegar business associate ni dismissed Bamban, Tarlac Mayor Alice Guo.
Ang utod ni Guo nga si Shiela, nga ang matuod-tuod nga pangalan amu si Zhang Mie, ang magapangatubang sang mga kaso bangud sa disobedience to summons kag paggamit sang peke nga passport sang Pilipinas suno kay DOJ Undersecretary Nicholas Ty.
Suno diri, si Cassandra Li Ong, ang representative sang Lucky South 99 POGO, ang magapangatubang sang summons kag mga kaso nga obstruction of justice.
Suno kay Ty, ang mga kaso nga money laundering ang igapasaka batok kay Shiela Guo kag posible kay Ong subong nga semana.
Dugang pa sini nga ang qualified human trafficking ang igafile man batok kay Ong nga ginaalegar konektado sa POGO sa Porac, Pampanga.
Madumduman nga si Shiela Guo kag Ong ang gindakop sa Indonesia sa tinalikdan nga semana.
