Gina-engganyo sang public information officer sang Department of Labor and Employment (DOLE) Region 6 ang mga mamumugon nga apektado sang COVID-19 pandemic nga mag-avail na sang mga programa sang ahensya agud makakuha sang financial assistance antes pa man ang expiration sang Bayanihan 2 sa Disyembre 19.
Sa interview sang Bombo Radyo Bacolod kay DOLE Region 6 spokesperson Niezel Anen Sabrido, ginpahayag sini nga dapat na maghingagaw ang mga displaced workers sa pag-apply sa mga programa sang DOLE bangud nga dapat mapagwa na nila ang pondo nga naka-alokar antes pa man ini ma-expire.
Suno kay Sabrido, kasubo kag kanugon lang kun magbalik ang pondo sa kaban sang gobyerno bangud para pa ini dapat sa mga kwalipikado kag nagakinahanglan nga mga benepisyaryo.
Nahibaluan nga ang mga mamumugon sa mga pribado nga sektor nga displaced ukon apektado sang pandemya ang pwede maka-apply online para sa second tranche sang cash assistance paagi sa COVID-19 Adjustment Measures Program (CAMP)
Makabaton ang mga ini sang one-time P5,000 nga cash assistance.
Sa karon suno kay Sabrido, masobra 10 mil na ka mga beneficiaries ang nahatagan sa Western Visayas.
Samtang, may specific naman nga pondo ang mga nagatrabaho sa tourism sector nga nadulaan sang trabaho.
Dapat nga mag-apply ang mga ini sa Department of Tourism kag ang DOLE na ang maga-assess kag magarelease sang ayuda.
Samtang, ang TUPAD naman ukon Tulong Panghanapbuhay sa Ating Disadvantaged/Displaced Workers ang isa ka community-based package nga assistance nga naghatag sang emergency employment para sa mga displaced workers, underemployed ukon seasonal workers nga makabaton sang daily minimum wage sa sulod sang minimum period nga 10 days kag indi maglapaw sa maximum nga 30 days depende sa klase sang trabaho nga pagahimuon.
