Nabatun na ni Marbie Cabardo ang resolution gikan sa Department of Labor and Employment (DOLE) nga nagareinstate sa iya bilang lawful vice president kag acting president sa CENECO Union of Rational Employees (CURE).
Sa interview sang Bombo Radyo Bacolod kay Cabardo, kaina lamang sini nabatun ang resolusyon bangod kaina lang siya nakareport sa opisina.
Pahayag sini nga ang ila anay Presidente nga si Stefannie Montaner ang napromote na bilang supervisor, apang antes ini nagbiya nagfile sang petition si Montaner upod sa tatlo pa ka mga officer sang impeachment batok sa iya.
Apang bangod nagpabor kay Cabardo ang mayorya sang mga officers, nakita sang DOLE nga wala sang basihan ang impeachment.
Nagfile pa ang mga ini sang Motion for Reconsideration, apang wala man gingrant sang DOLE.
Ginapasalamatan sini nga naggwa na ang resolusyon sang DOLE kag siya ang ginreinstate bilang Vice President kag acting president karun nga wala pa sang may nakabulos sa pwesto ni Montaner.
Paathag sini nga ang order ang final and executory.
Suno diri, magahulat pa sila sang schedule sang DOLE kun san-o mapatigayon ang special election para sa pwesto.
Apang sa personal nga paglantaw ni Cabardo, indi pa nagakaigo ang tion para sa special election ilabi na nga sila ang yara sa phase kun sa diin magasulod na ang Negros Electric Power Corporation (NEPC).
Sa karun, ginatinguhaan nila nga makanegosasyon kag maseguro ang pagrehire sa mga empleyado kasubong man mga benepisyo sang mga ini.
Ginapasalamat naman sini nga sila ang gina-acknowledge ni MORE Power President Roel Castro, nga nagpasalig nga sila ang bukas sa pagrehire sang mga empleyado sang CENECO.
Sa kabug-usan 423 tanan ang mga empleyado sa Central Negros Electric Cooperative, kag sa pagbaylo sang pagdumala sila ang pagahatagan sang gratuity pay, kag gilayon man nga irehire gani sila ang indi madulaan sang trabaho.
