Ginamonitor sa karun sang Department of National Defense ang mga nadischarge, nag-absent without official leave (AWOL) kag nagretiro nga mga miyembro sang Philippine Army.
Sa isa ka press conference nga ginpatigayon sa Dumaguete City, ginapahayag ni Defense Secretary Carlito Galvez Jr. nga ila ginamonitor sa karun ang mga anay miyembro sang militar kag ginalantaw ang posible nga rehabilitation sang mga ini.
Suno diri, luyag sini nga mahatagan ang mga ini sang maayo nga trabaho kag palangabuhian.
Ginpahayag man ni Galvez nga ang mga nagkaladakpan nga suspetsado sa Degamo assassination ang yara sa karun sa luwas nga lugar kag protektado man ang ila pamilya.
Suno diri, may yara sila sang ginauyatan nga dako nga ebidensya nga makatudlo sa mastermind sang krimen.
Ginhangkat man sini ang mga pumuluyo nga may ihibalo sa insidente nga maghatag sang impormasyon agud mahatagan sang hustisya ang kamatayon ni Governor Roel Degamo kag walo ka iban pa.
Nagakompormi naman si Pamplona Mayor Janice Degamo sa ginpatigayon nga raid sa mga propedad ni Negros Oriental 3rd District Congressman Arnie Teves kahapon.
Suno kay Mayor Degamo, nagakaigo lamang nga sudlon ang iya mga puluy-an agud makakita sang ebidensya.
Suno diri, kun indi man lang ini imbolbado sa maskin ano nga krimen, indi ini dapat magkahadlok nga i-raid ang ila puluy-an.
