Ginpahayag ni Defense Secretary Carlito Galvez Jr. sa isa ka press conference nga ginpatigayon sa Dumaguete City, nga kaupod sini ang taga-Negros Oriental sa ginalauman nga magbalik sa normal ang tanan.
Suno kay Galvez, naghatag sang mando si President Ferdinand Marcos Jr., nga dakpon ang tanan nga suspetsado sa pagpatay kay Governor Roel Degamo kag walo ka iban pa.
Ini ang kasunod sang nabaton nga direktiba nagikan sa presidente nga hatagan sang atensyon ang nagakatabo nga violence sa Negros Oriental.
Ginsiguro man sini nga mahatagan sang hustisya ang pamilya sang mga biktima, kag suno diri ila padaluman ang mga natabo nga pagpatay sa probinsya.
Nagapati man ini nga paagi sa pagbuligay sang tanan indi imposible ang pagsolbar sa Pamplona Massacre.
Samtang, ginpakigbahin man ni Galvez ang pahayag sang presidente nga wala sang padulongan ang ila trabaho sa gobyerno kun magapabilin nga kaangay sini ang sitwasyon sa pungsod.
Suno naman kay General Andres Castor Centino, Chief of Staff sang Armed Forces of the Philippines (AFP), naghatag sang mando si President Ferdinand Marcos Jr. nga mag-isa ang AFP kag PNP sa effiort nga mabalik ang katawhayan.
Ginsunod man sini ang direktiba ni Presidente Marcos nga pagtukod sang task force group kun sa diin gindirektahan sini ang tanan nga units sa Negros Island nga magupod sa task force nga magsuporta kag magcoordinate sa pagtrabaho.
Suno diri, ang AFP ang naga-isa sa mga pumuluyo sa katuyuan nga liwat nga maagom ang katawhayan kag hustisya kasubong man nga mahatagan sang seguridad ang komunidad sa probinsya sang Negros Oriental.
