Ginkompirmar sang pinuno sang Department of Social Services and Development (DSSD) nga nakaumpisa na sila panagtag sang cash assistance sang Huwebes para sa mga totally damaged nga mga balay matapos nga magwaswas ang bagyong odette sang tinalikdan nga bulan sang Disyembre.
Sa interview sang Bombo Radyo Bacolod kay Pacita Tero, ginpahayag sini nga ang budget ang nagikan sa Bacolod City government kag sa tagsa ka balay nga totally damage ang makabaton sang P10,000.00.
Suno kay Tero kapin 696 ka mga panimalay ang nahatagan na sang bulig sang syudad paagi kay Bacolod City Mayor Evelio “Bing” Leonardia.
Ginpahayag man sini nga ang mga panimalay ang nagikan sa 61 ka mga barangay sang syudad.
Suno sa DSSD head ang mga benepisyaryo sang cash assistance nagikan sa syudad ang ginalakipan sang mga totally kag partially damaged nga mga panimalay.
Suno kay Tero ang 696 nga mga panimalay nahatagan sang cash assistance ang totally damaged nga nagikan sa 57 ka mga barangay sang syudad.
Dako man ang pagpasalamat sini sa alkalde nga ang ginpanagtag sa mga apektado ang P10,000 sa tagsa ka panimalay apang ang sa guidelines ang P5000 lang dapat.
Ginkalipay man ini sang mga apektado nga mga pumuluyo bangud nagdoble ang ginalauman nila nga kandtidad kag makabakal na ang mga ini sang mga housing materials.
Suno kay Tero ang mga totally damaged lamang ang una nila nga gintagaan kag sa masunod naman nga semana ang mga partially damaged.
Suno sa DSSD head ang budget ang iya sang syudad nagikan sa opisina sang Disaster Risk Reduction and Management (DRRM) sang syudad.
