Nagpaathag ang pinuno sang Department of Social Services and Development (DSSD) sang Bacolod kun ngaa indi bilog nga kantidad ang ginabaton sang left out beneficiaries sang Social Amelioration Program kadungan sang ila pag-claim nagikan sa money remittance centers.
Sa interview sang Bombo Radyo Bacolod kay Pacita Tero, wala ini nakahibalo sang arrangement sang financial service provider sang Department of Social Welfare and Development (DSWD) kag mga money remittance center angot sa pagrelease sang SAP grant.
Suno diri, nagkontrata ang DSWD sa Star Pay nga amo naman ang nagpili sang remittance center.
Personal ini nga nagapati nga wala nakabayad sang P50 service charge kada transaction ang DSWD kag wala ini nadala sa budget nga ginhatag sang gobyerno.
Nahibaluan nga ang P6, 000 nga cash grant ang ginabuhinan sang 50 pesos ukon kabug-usan nga 100 pesos para sa P12, 000 nga financial assistance sang left out beneficiaries.
Nahibaluan nga sa karon nga proseso, ang benepisyaryo ang nagakadto sa barangay agud magkuha sang transaction code kag form antes ini magkadto sa remittance center.
Suno kay Tero, mahimo man nga makadirekta ang mga benepisyaryo sa remittance center agud magfill-up sang forms kag magkuha sang kuwarta apang gin-paagi ang mga ini sa tagsa ka mga barangay hall agud man makakuha sang forms, beneficiary reference number (BRN) kag certification nga qualified nga beneficiary ini antes magpadulong sa remittance center agud magkuha sang cash grant.
Ini ang ginhimo nga stratehiya sang DSSD agud indi magdugok ang tawo kag maobserve man ang health protocols batok sa Covid-19.
Kabug-usan nga 15,049 ka mga left out beneficiaries ang nalista sa Bacolod apang may yara man sila sang ginaapelar nga 300 ka mga tawo nga wala madala sa lista nga sarang mangin benepisyaryo.
Samtang, ginpahayag man ni Tero nga ang senior citizen ang mahimo magbuhat sang authorization letter nga nakabutang nga paryente sini kag ipadala ang valid government ID sa makuha sang cash grant sa mga lugar sa idalom sang Modified General Community Quarantine (MGCQ).
Aminado man si Tero nga isa man sa ginapalibugan nila ang mga tigulang nga palareho nga senior citizen ang nagaupod sa balay kun sin-o ang makuha sang cash grant.
