Ginpahayag sang provincial director sang Department of the Interior and Local Government sa Negros Occidental nga ang mga public officials ang indi lamang mga lideres kundi madamo pa ang mga ini sang obligasyon.
Suno kay Teodora Sumagaysay, ang mga public officials ang may obligasyon man sa transparency, accountability, competence kag efficiency sa paghatag sang serbisyo sa mga pumuluyo sa tagsa ka mga barangay nga ila ginaserbisyuhan.
Nagpahanumdom man si Sumagaysay sa mga public officials nga ang public office is a public trust gani dapat gamiton ini nga palaagyan agud nga magserbisyo sa mga pumuluyo.
Ginpahayag man sini nga ang mga public officials ang paglaom sang mga pumuluyo agud nga malab-ot ang mga pagbag-o para sa sosyodad.
Samtang, nagpanugyan ang gobernador sang probinsya sang Negros Occidental sa mga elected officials sang Liga ng Barangay sa probinsya nga magtrabaho nga nagahugpong agud nga mangin epektibo ang panggobyerno.
Suno kay Governor Eugenio Jose “Bong” Lacson, kinahanglan sang mga opisyales nga magtrabaho upod ang mga kaupdanan sa liga, sa Local Government Units kag iban pa nga mga stakeholders agud nga malab-ot ang collective kag mas constructive nga pagbag-o.
Suno pa kay Lacson, bilang gobernador ginalauman sini ang maayo nga pagserbisyo sang mga barangay officials kag dapat ang pagserbisyo ang may integridad kag dapat honest man nga pagserbisyo.
Suno pa diri, dapat man nga panumdumon sang mga opisyales nga ang kadalag-an sang ila pagserbisyo ang nakadepende sagihapon sa kooperasyon sang ila nga constituents.
Ginpahayag man ni Lacson nga ang mga ginpili nga mga opisyales sang liga ng mga barangay ang dapat mangin inspirasyon sang mga punong barangay kag mga barangay officials sa mga kabarangayan sa probinsya.
