Padayon ang monitoring sang Department of Trade and Industry-Negros Occidental sa mga merkado sa ciudad kag kabanwahanan sa mga nagabaligya sang bugas nga nagasunod sa Executive Order (EO) No. 39 nga nagatalana sang price ceiling para sa regullar-milled rice kag well-milled rice.
Sa interview sang Bombo Radyo kay DTI- Negros Occidental provincial director Engr. Lynna Joy Cardinal, masobra sa 500 ka mga rice retailers sa kabilogan nga probinsya sang Negros Occidental ang nakabaton sang tag P15,000 nga subsidy.
Ini ang mga rice retailers nga nagtuman sa EO 39 nga nagatalana sa presyo sang bugas nga P41 sa regular milled rice kag P45 sa well-milled rice.
Suno kay Cardinal, sa karun wala sang ano man nga report angot sa mga rice retailers nga nagbalik sa pagbaligya sang mahal nga presyo sang bugas apisar nga nakabaton na sang ayuda, apang nagsiguro ini nga padayon sa gihapon ang ila monitoring sang DTI agud mapasiguro ang pagsunod sang mga rice retailers sa EO 39.
Samtang, wala pa man sang may nabaton nga impormasyon ang DTI nagikan sa Department of Social Welfare and Development (DSWD) nga nagarequest sang lista para sa ika-apat nga batch sang tagtaganay.
