Mas ginpa-intensify pa sa karun ang monitoring sang Department of Trade and Industry sa mga ginabaligya nga Christmas Lights samtang nagahilapit ang adlaw sang paskwa.
Sa interview sang Bombo Radyo kay DTI-Negros Occidental Provincial Director Engr. Lynna Joy Cardinal, sa idalum sang product standard law sa pagmonitor sa mandatory product nalakip diri ang Christmas Lights nga dapat may yara sang Philippine Standard (PS) Quality kag Import Commodity Clearance (ICC) mark.
Suno diri, sa Christmas season, mas ginapa-intensify pa gid sang DTI-Negros Occidental ang pagmonitor sa mga Chistmas lights nga ginabaligya sa mga stores.
Ini dapat may yara sang marka agud mahatagan sang seguridad ang mga manugbakal nga safe kag kalidad ang ila ginabakal.
Sa karun, sa padayon nila nga monitoring, wala sang ano man nga nakita nga nagalapas sang pagbaligya sang Christmas lights nga wala sang marka.
Nalakip man diri ang mga produkto nga naggikan sa luwas sang pungsod.
Pahayag ni Cardinal, nahatagan na sang impormasyon ang mga stores sang brand nga compliant kag nagasunod sa mandatory nga pagbaligya.
Pahanudom ni Cardinal, magulu-aligmat sa pagbakal sang christmas lights kag indi maglagas sa barato nga may dala nga risgo.
