Ginpahayag sang Schools Division Superintendent sang Department of Education (DepEd) Division of Bacolod City nga excited sila sa pagbukas sang klase subong nga adlaw.
Sa interview sang Bombo Radyo kay Gladys Amylaine Sales, mas preparado na ang DepEd subong nga tuig komparar sang tinalikdan nga tuig bangud wala pa sila nakaadjust kag nakibot sang ginpatuman ang distance learning.
Subong nga adlaw, may yara sila sang patigayunon nga virtual flag raising ceremony kag may yara sang limited face to face sa mga fully vaccinated nga mga manunudlo.
May patigayunon man nga orientation kag magahimo man sang group chat (GC) para macontact man sila sang manunudlo apang ang account nga gamiton sang estudyante ang account sang ginikanan para may guidance.
Nagpanugyan si Sales sa mga ginikanan nga indi pag-ipost sa social media ang mga sala nga ila nakita sa mga modules bangud natural lang ang magsala kag indi patas para sa manunudlo nga naghimo sang module nga gamiton ini batok sa ila.
Ginpasiguro man ni Sales nga kun may pamangkot ang mga estudyante mahimo man ini nga makig angot sa ila nga respective teachers.
Ginpahayag man sini nga may yara sang standard nga module nga ginapagwa ang division kag napaidalom man ini sa quality assurance.
Ang mga modules ang ipanagtag sang mga eskwelahan sa mga estudyante.
Suno kay Sales kinahanglan ini nga ipasa matapos ang duha ka semana.
Nagpanugyan man ini sa mga ginikanan nga indi pagsabtan ang mga modules sang mga kabataan bangud ang mga ini ang mapierde lang, sabaylo buligan ang mga ini nga makadevelop sang study habbits.
Aminado man ang mga ini nga madamo sila sang narealisar subong nga wala sang face to face learning kag isa na diri nga mahimo magtuon ang mga kabataan nga wala sang manunudlo bangud paagi sa teknolohiya makatuon ang mga estudyante, apang kinahanglan lamang nga mangin maalam sa pagsala sang impormasyon nga makuha sang mga ini.
May yara man sang gindesignar nga learning assistant nga mahimo tawagan agud nga mag-assist sa mga estudyante nga nagakinahanglan.
Nagapati man ini nga ang bata nga nagaexcel sa klase kaangay sang valedictorian ang magaexcel sa gihapon apisar nga wala sang face to face.
