Nangin madinalag-on ang pagbukas sang School Year 2021-2022 kahapon suno kay Bacolod City Schools Division Superintendent Gladys Amylaine Sales.
Sa interview sang Bombo Radyo kay Sales, ginpahayag sini nga alas 7:30 nagsugod ang virtual program kun sa diin nagpatigayon sang simultaneous flag ceremony sa bilog nga pungsod.
Suno sa iya, 68 ka mga eskwelahan ang nag-open sa virtual program kun sa diin nagtambong man ang mga estudyante kag nagsuksok sang bag-o nga uniform.
Nagbalik naman sa eskwelahan ang mga manunudlo.
Ginakabig naman sini nga manami ang data sini nga school year bangud 89 percent na sang ila target ang enrolled ukon 105,000 sa 150,000 nga target nga mga estudyante.
Suno sa iya, tubtob pa sa katapusan sang Setyembre ang ila pagbaton sang late enrollees.
Ginalauman naman sini nga makabalik na sa face to face classes sa masunod nga tuig kag ginpakigbahin nga 70 porsyento na sang mga manunudlo ang vaccinated.
