Ginakasubo man sang Department of Education Division of Negros Occidental ang natabo nga pagpangluthang kag suicide sa Bilbao Uybico National High School sa Barangay Po-ok, Hinobaan, Negros Occidental kahapon sang aga.
Ilabi na nga ang imbulbado diri amo ang prinsipal kag isa ka manunudlo kag ang bana sini.
Suno kay Ian Arnold Arnaez, tagpamaba sang DepEd Division of Negros Occidental, nagahulat nalang ang mga ini sang resulta sang imbestigasyon sang mga otoridad kag gilayon man nga magapagwa sang initial statement.
Aminado naman ini nga tuman ka makasilidhi ang hitabo ilabi na nga kadungan pa ini sa Holy Tuesday.
Panugyan man ni Arnaez nga dapat pamalandungan ang masubo nga hitabo.
Sa pihak nga bahin, nagahingyo man ini sa publiko nga likawan ang magshare sang mga post natuhoy sa insidente bangod indi ini maayo nga balita kag ang pagpost sini sa social media ang wala man sang maayo nga epekto.
Nagalaom naman si Arnaez nga pinaagi sa imbestigasyon sang mga kapulisan kag SOCO, mahatagan sang kasanagan ang kaso.
Ang DepEd Division of Negros Occidental ang nagpalab-ot na sang pagpakig-unong sa nalisdan nga mga pamilya partikular na sa biktima nga mag-asawa.
Nagpasalig naman ini nga pungkuan sang mga opisyales sa DepEd ang nahanungod sa insidente kag malauman nga magapagwa ang mga ini sang official statement.
