Nagpanawagan ang Department of Education Division of Negros Occidental sa mga ginikanan nga indi magduha-duha nga pabakunahan ang mga kabataan agud may dugang sila nga proteksyon sa COVID-19 sa tion nga magresume na ang face to face classes sa bulan sang Noyembre.
Santo sa DepEd Order No. 34, magabukas ang SY 2022-2023 sa Agusto 22 kag magatakop sa Hulyo 7 tuig 2023 ukon 203 school days.
Suno kay DepEd Negros Occidental spokesperson Ian Arnold Arnaez, 200 ka adlaw ang minimum nga mandated number of days samtang 220 naman ang maximum.
Sa ikaduha nga semana sang bulan sang Agusto, ang mga manunudlo nga yara sa idalom sang Negros Occidental Division ang magapaidalom sa In-Service Training.
Aminado naman ini nga may nagareklamo nga indi nila maenjoy ang 60 ka adlaw nga bakasyon bangud may In-Service Training kag Brigada Eskwela.
Kun lantawon ang school calendar suno kay Arnaez, nakabutang diri ang mga plano sang DepEd para sa School Year 2022-2023.
Halin Agusto tubtub Oktubre, pagahandaan ang full in-person classes sa bulan sang Nobyembre.
Suno kay Arnaez, face-to-face na ang klase sa tanan nga mga eskwelahan sa Alert Level 1 kag Alert Level 2.
Samtang wala pa nadeklarar nga nadula na ang COVID suno kay Arnaez, indi lang magkampante ang mga manunudlo kag mga estudyante.
Sa karon, vaccinated na ang kalabanan nga mga manunudlo apang may manubo nga vaccination rate sa mga kabataan gani mas maayo gid kun dal-on sila sang ginikanan sa vaccination centers.
