Bilang pagcomply sa direktiba ni Presidente Rodrigo Duterte, ginpanindugan sang Department of Education kaina nga wala sang face-to-face classes samtang wala sang bakuna batok sa coronavirus disease.
Sa isa ka statement, ginpahayag ni DepEd Secretary Leonor Briones nga magasunod ang ahensya sa direktiba sang presidente.
Madumduman nga sang Mayo 25, ginpahayag ni Duterte nga indi sini pagpahanugutan ang pagbukas sang klase tubtub nga mangin available ang bakuna batok sa COVID 19.
Gin-athag naman ni presidential spokesperson Harry Roque nga indi magresume ang face to face classes samtang nagapabilin ang community quarantine nga nagahandom nga mapunggan ang paglapta sang virus.
Suno kay Secretary Briones, nagahanda ang DepEd sang implementasyon sang blended learning bilang kabahin sang commitment sang ahensya nga himuon nga available ang edukasyon sa karon nga may yara pa sang pandemya.
Suno sa tiglikom, ginahanda kag iga-update subong nga tuig ang radio, television, online kag modular learning nga pre-existing naman nga method kag ginagamit sa sulod sang pila na ka dekada.
Ginahanas man sa karon ang mga manunudlo suno kay Briones nga maggamit sang mas bag-o nga platform kag innovative tools agud nga makadugang sa ila professional development.
Suno diri, nagabuligay sila sang private sector kag education experts agud nga malab-ot ang nasambit nga mga tikang.
Magahatag naman ang DepEd sang regular nga readiness report sa publiko.
