Nagpanugyan ang Department of Education (DepEd) Division of Negros Occidental sa mga ginikanan subong nga nagsugod na ang distance learning para sa School Year 2020-2021.
Sa interview sang Bombo Radyo Bacolod kay Ian Arnold Arnaez, PIO sang DepEd Division of Negros Occidental, ginpahayag sini nga dapat hatagan sang enjoyable experience ang mga kabataan sa ila nga pagtuon kag indi ini dapat mangin traumatic.
Suno kay Arnaez, nahibaluan gid nila nga luyag sang mga ginikanan nga matapos dayon ang activities ukon module sang ila mga bata apang dapat hinay-hinayon lang.
Dugang pa sini nga indi dapat pag-ibombard sang mga ulubrahon ang mga bata bangud dapat nga mag-enjoy ang mga ini samtang nagatuon.
Suno pa kay Arnaez nga may yara sang weekly plan nga ginahatag ang mga manunudlo sa ila nga mga estudyante gani nagakadapat man nga hatagan sang schedule sang mga ginikanan ang ila nga mga bata.
Paathag sini, dapat may yara man sang break time kag play time ang mga estudyante agud nga indi ang mga ini madulaan sang interes sa pagtuon.
Suno kay Arnaez, importante gid nga magiyahan sang mga ginikanan ukon mga magulang ang mga bata subong nga distance learning ang mode sang klase.
Ginkumpirmar man ni Arnaez nga wala sang periodical examination nga pagapatigayunon subong nga school year.
Formative assessment kag summative assessment ang pagasundon nga grading system sang mga eskwelahan subong nga may yara sang pandemic.
