Gin-athag ni DepEd Division of Negros Occidental Public Information Officer Ian Arnold Arnaez nga ginapatigayon ang early regsitration para sa School Year 2023-2024 agud may yara sang estimated nga numero sang mga estudyante ang mga buluthuan kag mahatagan sang insakto nga budget ang mga eskwelahan.
Sa interview sang Bombo Radyo kay Arnaez, ang early registration igapatuman para sa mga Kindergarten, Grade 1, Grade 7 kag Grade 11 students.
Suno diri, sa data nga ila nakuha, 62, 530 na ka mga estudyante ang nakaparegister nga mas manubo kumparar sa nakaligad nga tuig nga nagdangat sa kapin 63,000, apang sa kabilogan nga Western Visayas, ang probinsya sang Negros Occidental ang may pinakamataas nga numero sang early registrants.
Gin-athag sini nga indi ini early enrollment kundi early registration para sa mga estudyante, gani kinahanglan nila sa gihapon magpadulong sa mga buluthuan nga ila luyag sudlan para magpa-enroll.
Iya man gin-eksplekar ang tinutuyo sang Department of Education sa pagpatigayon sang early registration, nga makahatag sa DEPED sang expected nga numero sang mga estudyante sa isa ka buluthuan agud mahatagan sang husto nga plano kag budget ang eskwelehan kun sa diin ginabase sa numero sang estudyante ang ginahatag nga School Maintenance and Other Operating Expenses (MOOE).
Ginaengganyo ni Arnaez ang mga ginikanan kag estudyante nga magpa-register agud sila ang marekord kag indi pagkulangon sa budget ang buluthuan.
