Liwat nga ginpahanumdom sa mga manunudlo sa Negros Occidental nga dapat magpabilin nga non-partisan subong nga 2025 Midterm Elections.
Sa interview sang Bombo Radyo Bacolod kay Atty Ian Arnold Arnaez, public information officer sang Department of Education division of Negros Occidental, wala nagkulang ang DepEd sa pagpahanumdom sa mga manunudlo sa bilog nga Pilipinas sa polisa kag guidelines may kaangtanan sa eleksyon.
Suno diri, ginarespeto sang DepEd ang political inclination sang mga manunudlo kun sin-o ang ila luyag botohon apang indi dapat makita ang ila political inclinations.
Suno kay Arnaez, para mangin safe ang mga manunudlo mas maayo nga generalized na lamang kun magpagwa sang statement kag indi magbuya sang mga sugilanon nga obvious nga nagadampig sa isa ka kandidato kasubong man indi mag-upod sa mga caucus sang kandidato.
Pahanumdom sang DepEd officials nga indi malikawan nga may ara sang mga nagadumot ilabi na nga mainit sa karun sa mata sang mga supporters sang kandidato ang kada tikang sang mga imbulbado sa eleksyon kalakip na ang mga manunudlo.
Aminado man si Arnaez nga wala pa ini sang nahibaluan nga may nagreklamo sa DepEd Negros Occidental sa tinalikdan nga mga eleksyon bangod kalabanan nga ginapalab-ot ang reklamo sa Commission on Elections (COMELEC).
Suno diri, sarang man makareklamo sa DepEd partikular na ang mga kandidato, apang nagapati si Arnaez nga malawigan ang proseso bangod ang pagserbe sa eleksyon ang non-teaching related kag wala nalakip sa purpose sang manunudlo.
Ang DepEd ang magahatag man sang legal assistance sa mga manunudlo nga mahimo mangatubang sang reklamo.
Dugang pa sini nga indi man maghatag sang sanction ang DepEd angot sa reklamo, kag sa masami, ang reklamo ang ginafile sa Comelec nga amo ang magapanaog sang desisyon.
