Ginkompirmar sang tagpamaba sang Department of Education (DepEd) Division of Negros Occidental nga may yara sang mabaton nga laptops kag drones ang probinsya.
Sa interview sang Bombo Radyo kay Ian Arnold Arnaez, bangud sa madugay nga procurement process sa gobyerno kag courier process, wala pa nakaabot ang drone kag laptops nga ginbakal sang gobyerno.
Ginpahayag man sini nga may natumod na nga position ang pagahatagan sang laptop samtang ang drone naman nga mabaton sang division office ang pagagamiton sang engineers para sa pagtsekyar man sang DepEd sa mga naapektuhan sang natural dissasters.
Ginpahayag man ni Arnaez nga ang pagbakal sang DepEd sang laptops ang sabat sang ahensya sa madugay na nga problema sang mga manunudlo nga nagagasto sang personal agud may gamiton para sa trabaho kaangay lamang sang pag-arkila sang laptop ukon pagpangutang agud nga makabakal sini.
May partnership man ang Deped sa Local School Board (LSB) agud mabakal ang iban nga requirements sa ahensya apang limited man ang ila resources.
Suno kay Arnaez, indi man matalalapud mahatagan apang ginahimo man sang DepEd ang tanan agud nga mahatagan sang solusyon ang problema sang manunudlo.
