Magasunod ang Department of Education (DepEd)-Negros Occidental sa ano man nga igamando ni President Rodrigo Duterte apisar nga nanugunan man sila sa mga ginhimu na nga mga preparasyon para sa limited face-to-face classes.
Suno kay Schools Division Superintendent Marsette Sabaluca, nag-umpisa sila sa 29 ka mga eskwelahan nga ginpili para sa pilot face-to-face classes para kuntani sa maabot nga Enero.
Apang sang ginpafinalize ang mga ini, pila sa mga nakabahin ang nagpahayag nga indi nalang anay mag-entra sa programa kag magahulat nalang sang resulta.
Kalakip sa preparasyon amo ang pagpakigsugilanon sa alkalde kasubong man sa barangay.
Sang tinalikdan nga semana naman, sa 29 nga kabug-usan, lima lang ang eskwelahan nga nalakip sa apat ka munisipalidad ang ginpahanugutan sang ila nga mga alkalde sa pagpasakop sa limited face-to-face classes.
Nangin matawhay naman ang pagginhawa ni Sabaluca sa nangin desisyon ni Duterte nga ipaiway anay ang mga face-to-face classes bangod sang Desyembre lang ini ginpanugyan nga preparahana.
Apang pahayag ni Sabaluca nga madamo pa sang dapat estoryahan kag ipreparar kaangay sang pagpakigsuguilanon sang district supervisor sa tanan nga stakeholders nga imbulbado nga gin-uyangan gid sini sang tiempo.
Antes paman maggwa ang ulihi nga mando ni President Durete, ginahulat nalang sang probinsya ang criteria samtang nagplastar naman ang mga ini sang kaugalingon nga plano.
Panugyan naman sang mga ini nga isa lang ka eskwelahan ang dapat nga mangin partisipante sa isa ka munisipalidad ukon ciudad agud nga matutukan ang mga ini kag madukumento sang mas maayo.
