Ginpahayag sang public information officer sang Department of Education division of Negros Occidental nga sa Disyembre 20 ang ulihi nga klase antes ang holiday break santo sa 2024-2025 School Calendar.
Sa interview sang Bombo Radyo Bacolod kay Ian Arnold Arnaez, mahimo nga sa Disyembre 19 ukon 20 naman magapatigayon sang Christmas party ang mga eskwelahan.
Aminado si Arnaez nga may mga tion nga nagapatigayon sang adjustment bangod sa suspension of classes kag mga activities, apang kun mahimo, dapat nga sundon gid ang School Calendar.
Suno diri, ang DepEd Order nakaligad nga tuig ang liwat nga gin-activate may kaangatanan sa selebrasyon sang Christmas Party.
Ini kasunod sang panawagan sang Malacañang sa mga ahensya sang gobyerno nga simple kag meaningful lamang ang patigayunon nga Christmas Party bilang konsiderasyon sa mga nahalitan sang asod-asod nga mga bagyo.
Sa DepEd order, ginadumilian ang amutay apang ginakonsiderar man ang voluntary contribution.
Dugang pa ni Arnaez, nga wala dapat sang pilitay sa Christmas Party kag bisan wala naka-amot ang indi dapat dumilian nga makatambong.
Sa karun, may ginapatigayon nga eliminations sa district level para sa mga atleta nga ipadala sa division level tubtob sa Area Meet nga patigayunon sa Disyembre 18 tubtob 20.
Ang nasambitan nga aktibad ang wala man sang epekto sa regular school days bangod indi man tanan nga estudyante ang atleta gani padayun lamang ang klase.
Matapos ang holiday break, magabalik ang estudyante sa Enero 2 ukon 3.
Apang yara man ang posibilidad nga mag-anunsyar ang Malacañang nga sa Enero 6, Lunes na lamang ang pagbalik.
Suno kay Arnaez, sa ulihi nga semana sang Marso ang pagtakop sang klase kag ang School Year 2025-2026 ang magabukas na sa bulan sang Hunyo.
