Aminado ang tagpamaba sang Department of Education Division of Negros Occidental nga dako ang impact sa mga manunudlo sang pagsaka sang special hardship allowance sang education personnel, nga exposed sa hazards kag kabudlayan bangud sa nature ukon lokasyon sang ila nga trabaho.
Suno sa DepEd, ang SHA ang fixed na nga 25 porsyento sang bulanan nga basic salary sang manunudlo nagikan sa tinalikdan nga 15 tubtub 25 poryento.
Ini ang kasunod sang gin-issue nga joint circular sang DepEd kaupod ang Department of Budget and Management.
Sa interview sang Bombo Radyo kay Ian Arnold Arnaez, madugay na nga ginaayo sang mga manunudlo nga pasakaan sang DepEd ang SHA.
Suno kay Arnaez, ginaabi-abi sini ang mga manunudlo ilabi na gid ang naassign sa mga lugar nga malayo kag mabudlay lab-uton.
Dako nga bulig para sa mga manunudlo suno kay Arnaez ang SHA ilabi na sa ila transportasyon padulong sa ginatrabahuan, kag dako man nga dugang sa ila ginakita.
Suno sa DepEd, ang dugang nga kompensasyon ang nagacover sa tanan nga elementary kag secondary level teachers nga naassign sa mabudlay nga lugar, mga manunudlo sa pure multi-grade schools kag subong man ang mga mobile teachers kag non-formal education ukon ang Alternative Learning System (ALS) coordinators.
Eligible man nga makabaton ang mga school heads nga assigned sa hardship posts ukon pure multi-grade schools.
Ang kwalipikado nga mga recipients ang required nga magsubmit sang ila daily time record bilang supporting document agud nga maka-avail sang allowance.
Suno sa DepEd, committed sila nga magpasiguro sang safety sang mga manunudlo ilabi na ang mga yara sa remote areas.
