Ginalantaw sang Project Development Officer 2 kag Public Information Officer sa Department of Education (DepEd) Division of Negros Occidental nga mayorya sa mga estudyante ang luyag na nga magbalik sa face to face classes.
Suno kay Ian Arnold Arnaez, sa karun makita na sa palibot kaangay sa mga malls kag iban pa nga public places ang mga kabataan nga nagakit-anay.
Santo sa DepEd Order No. 34 kag pronouncement ni Vice President Sara Duterte, nga amo ang Education Secretary nga ipatuman na ang full face to face classes sa Nobyembre 2.
Samtang ginakabig naman nga transition period ang Agosto 22 tubtob Oktobre 31, kag sarang pa nga mapatigayon ang blended kag distance learning.
Nagapati si Arnaez nga mapatuman na ang 100 percent in-person classes sa DepEd Negros Occidental antes paman ang Nobyembre 2.
Samtang ginpasalig naman ni Arnaez nga mas relaxed na ang pagpatuman santo sa DepEd Order No. 34, apang may mga rekomendasyon gihapon sa COVID protocols.
Dugang pa sini nga indi na kinahanglan ang inspection sa mga buluthuan antes ang pagpatuman sang face to face classes bangod nagapati ang mga ini nga nakapreparar na ang mga eskwelahan.
Ini bangod ginrequire na ang tagsa ka mga eskwelahan sang School Safety Assessment Tool agud makapreparar sa face to face classes.
Madumduman nga sang tinalikdan, antes mapahanugutan ang eskwelahan para sa in-person classes, dapat nga matuman anay ang checklist sa School Safety Assessment Tool, kun sa diin halos tanan nga eskwelahan ang nagapreparar naman kuntani para sa assessment.
Bangod sini, ginalauman na nila nga sa Nobyembre 2, kaangay nga magabalik naman sa pre-pandemic set up ang mga buluthuan.
Nakadepende naman sa eskwelahan ang programa sa pagpatuman sang safety protocols.
Paathag sini nga apisar wala na sang restriction, ang facemask ang magapabilin gihapon bangod wala pa sang ginpanaog nga mando natuhoy sa optional nga pagsuksok sini.
Ginalantaw man sini nga mahimo mabudlay ang pagpatigayon sang physical distancing partikular na sa mga klase nga nagadangat sa 60 tubtob 70 ang estudyante ilabi na kun magamay ang classroom.
Indi man mahimo nga tungaon sa duha ang klase bangod indi na madugangan ang load sang mga manunudlo.
Ginalauman na ni Arnaez nga magabalik na sa normal ang natalana nga oras sa kada subject kag magatinir naman sa eskwelahan ang mga kabataan sa bilog nga adlaw.
