Ginpasalig sang tagpamaba sa Department of Education (DepEd) division of Negros Occidental nga apisar sa suspension sang face-to-face classes, indi maapektuhan ang regular number sang School Days.
Madumduman nga ginpatemprano ang pagtakop sang School Year 2023-2024 agud amat-amat mabalik ang daan nga school calendar, gani double time man ang pagpaigo sang mga manunudlo sang ila mga lectures sa kabataan.
Sa interview sang Bombo Radyo Bacolod kay Ian Arnold Arnaez, public information officer sa DepEd – Negros Occidental, apisar nga may kanselasyon sang face-to-face classes ang mga eskwelahan ang gilayon man nga nagshift sa iban nga mode of delivery kaangay sang modular ukon online.
Sa DepEd – Negros Occidental, ang nakadelarar na sang suspension sang face-to-face classes ang ginalakipan sang banwa sang EB Magalona, Murcia, Pulupandan kasubong man ang ciudad sang Talisay.
Samtang may mga eskwelahan naman nga boluntaryo nga nagsuspender sang klase apisar nga wala sang deklarasyon gikan sa local government unit (LGU).
Paathag ni Arnaez nga nakasaad mismo sa layi ang rules and responsibility sang mga school heads nga pagsiguro nga conducive para sa pagtuon ang eskwelahan.
Kag sa tion nga makita nga indi na conducive sa pagtuon ang eskwelahan, dapat man nga magpangita sang iban nga pamaagi sa pagtudlo kaangay sang modular ukon online.
May iban man nga apisar sa kainiton, ginpadayun ang klase apang ginpanubo ang number of school hours kag may-ara man sang nagpatigayon sang shifting.
Aminado si Arnaez nga lainlain ang estratihiya sa kada eskwelahan kag ini ang yara na sa discretion sang school principal bangud sila ang mas nakahibalo sang sitwasyon.
Paathag sini nga may mga buluthuan nga napalibutan sang mga kahoy nga mas mabugnaw kag wala nagakinahanglan sang suspension, samtang may-ara naman sang mga eskwelahan nga wala sang panaming sa init sang adlaw.
Indi naman mahimo ipatuman ang senimana ukon binulan nga suspension sang klase bangod pabag-o bag-o ang heat index, kag may tion nga ini ang naganubo.
Magluwas diri, ginamonitor man sang DepEd-Negross Occidental ang mga kahalitan nga matuga sang tuman nga kainiton sa ikaayong lawas.
Sa karun, wala pa sila sang nakita nga malala nga epekto, kag sa masami ang halit ang yara lamang sa pagtrangkaso ukon pagkasunggo sang mga kabataan.
