Preparado na ang Department of Education-Division of Negros Occidental sa patigayunon nga graduation ceremonies kag end of school year rites sa humalin sa Mayo 29 tubtob Mayo 31.
Sa interview sang Bombo Radyo kay Ian Arnold Arnaez, public information officer sang Dep-Ed Division of Negros Occidental, wala sang balayran ang mga ginikanan kag estudyante sa palaabuton nga graduation kag commencement exercises bangud covered na ini sang maintenance and other operating expenses (MOOE).
Suno kay Arnaez, indi naman mandatory ang pagsuksok sang toga kag ini ang magadepende sa makasugtan sa meeting.
Madumduman nga gin-abisuhan sang DepEd ang mga buluthuan nga magpatigayon sang graduation indoors bangud sa tuman kainit nga tiyempo kag dapat nga mangin simple lamang apang memorable ang seremonya.
Indi man dapat magkolekta sang para sa yearbook bisan ini ang aprubado pa sang Parents-Teachers Association (PTA), bangod ang PTA resolusyon ang indi makapangibabaw sa DepEd memorandum.
Samtang, pagahatagan naman sang tion ang mga manunudlo sa bakasyon kun sa diin wala sila dapat sang workloads ukon ulubrahon may kaangtanan sa eskwelahan.
Sa pihak nga bahin, ginpanawagan man ni Arnaez sa tagsa ka mga eskwelahan nga magkuha sang inspirational guest speakers sa graduation rights nga makamotibar sa mga kabataan.
Dapat likawan ang mga politiko nga luyag maggamit sang graduation bilang platform agud mapromote ang kaugalingon para sa palaabuton nga eleksyon.
