Nagpangabay ang Superintendent sa Department of Education division of Negros Occidental sa mga estudyante nga indi pagpabay-an ang modules karun nga suspendido ang face to face classes.
Ini matapos gindeklarar ang suspension sang klase sa bilog nga probinsya bangod sa epekto sang Severe Tropical Storm OPONG kun sa diin may mga area na nga ginpaidalom sa Storm Signal No 1 kag 2.
Sa interview sang Bombo Radyo Bacolod kay Gladys Amylaine Sales, ang modules ukon emergency learning kit ang nagahatag sang tyansa nga bisan may-ara sang Bagyo makapadayun gihapon ang pagtuon.
Gani pangabay sini nga talupangdon sang mga estudyante ang modules.
Suno kay Sales, natudluan na ang mga kabataan kun paano magresponder sa emerhensya, kaangay sa pagkooperar sa ginikanan.
Pahayag sini nga mas maayo nga may balasahon ang mga kabataan, gani ginapasalamatan sini nga may ginaprint nga modules.
Sa pihak nga bahin, kun sa executive order nga ginapagwa sang banwa ukon ciudad tuhoy sa class suspension wala nabutang kun lakip ang manunudlo kag non-teaching personnel, nakadepende sa manunudlo kun sila ang magareport.
Apang may mga EO man nga naka-athag na mismo nga lakip ang mga manunudlo kag school staff sa indi na kinahanglan magreport sa buluthuan.
