Nagapati si Department of Education Negros Island Region Director Dr Ramir Uytico nga makakuha gihapon sang mataas nga pwesto ang Negros Island Regional Athletics Association Meet sa 2026.
Sa pahayag ni Uytico, gina-umpisahan na nila ang preparasyon bangod nagseparar na ang NIR sa Region 6 kag Region 7.
Apang sa performance sang Negros Occidental, nga nakakuha sang pinakamadamo nga gold , silver kag bronze medals para sa Western Visayas sa Palarong Pambansa 2025, nagapati si Uytico nga mataas gihapon ang pwesto nga makuha, bangod magadugang pa sang medalya ang Negros Oriental kag Siquijor.
Nag-umpisa naman sila sa pagdiskusyon ni Negros Occidental Governor Eugenio Jose “Bong” Lacson kun paano mapadamo pa ang maayo nga atleta.
Kun ang Negros Occidental ang nakahakot sang 18 ka gold medals sa Palarong Pambansa 2025, nagalaom si Uytico nga ini ang mapadangat sa 50 sa Palarong Pambansa 2026.
Apang antes sini, isa man sa ila una nga preparahan ang Regional Meet.
Ginduso naman ni Lacson nga sa Negros Oriental patigayunon ang Negros Island Regional Athletics Association Meet 2026.
