Magahimo sang tikang ang Department of Education – Negros Island Region agud indi maapektuhan ang pagtuon sang mga estudyante nga nahalitan sang Kanlaon Volcano eruption.
Sa pahayag ni DepEd NIR Director Dr. Ramir Uytico, ang mga DepEd division sang mga local government units nga apektado kaangay sang Canlaon City sa Negros Oriental; La Carlota City, Bago City kag banwa sang La Castellana sa Negros Occidental ang nagdihon naman sang ila nga contingency plan, kag magahimo man sang separado ang DepEd NIR.
Suno kay Uytico, magluwas sa safety, luyag sang DepEd nga mapadayun ang pagtuon sang mga kabataan sa pihak sang ano man nga kalamidad.
Isa sa measures nga mahimo ipatuman amo ang adjustment sa oras sang klase.
Apang bangod may mga eskwelahan nga ginagamit nga evacuation centers, partikular na sa banwa sang La Castellana nga may pinakamadamo nga evacuees, ang mga nagatinir ang indi naman nila pagpahalinon.
Sa baylo, ang mga klase nga dapat patigayunon sa classrooms nga gin-okupar sang mga evacuees ang ginalantaw nga himuon na lamang sa gwa, kag magapatindog na lamang sang tent nga magaserbe nga temporary classrooms.
Nahibaluan nga magaumpisa na ang klase sa tanan nga elementary kag secondary public schools sa Hunyo 16.
Paathag ni Uytico nga ini ang indi mahimo kun wala sang kooperasyon sang mga apektado nga banwa ukon ciudad, mga ginikanan sang kabataan, kag mga manunudlo kag principal.
Pahanumdom sini nga indi masarangan sang isa lamang ang trabaho, gani kinahanglan ang pagbululigay.
