Nagakalipay kag nagapasalamat ang schools division superintendent sang ciudad sang Bacolod bangod sa desisyon nga ipostpone ang pagbukas sang klase sa Oktubre 5.
Suno kay Gladys Amylaine Sales, sang nagkonsulta ang DepEd sa mga manunudlo sa ciudad sang Bacolod natuhoy sa pagbukas sang klase, personal na sini nga ginpahayag ang pagkabalaka sa pagbukas sang klase sa Agosto 24.
Sa pahayag ni Sales, pwede ini nga magsugot kun pagabuksan ang klase sa Agosto 24 apang ginakakulbaan sini ang pagdamo sang kaso sang COVID-19 sa ciudad.
Mas luyag naman sini ang desisyon ang i-delay ang pagbukas sang klase sa Oktubre 5 bangod nakadepende sa sitwasyon sang health status sa pungsod.
Nagapasalamat man ini nga namati ang Department of Education Secretary sa mga hingyo sang mga manunudlo.
Ginpaathag man sini ang kamatuoran nga nagakunsulta ang DepEd sa mga manunudlo sa nagkalain-lain nga bahin sang pungsod sang tempranu pa lang.
Padayun naman sini nga ginapasalamatan ang kapisan kag sakripisyo sang mga manunudlo kag mga prinsipal.
Sa karun, nahuman na ang pagprint sang isa ka semana nga module sang mga estudyante sa ciudad kag nagapadayun naman ang pagprint sang para sa ikaduha nga semana.
Nahibaluan nga magahatag sang module ang mga manunudlo sa mga estudyante kada semana.
Sa bahin naman sang mga manunudlo, pila sa mga ini ang ginapahanugutan nga magwork-from-home ilabi na ang may ginabatyag nga balatian sa lawas.
Samtang padayun naman nga ginakinahanglan ang bulig sang iban nga manunudlo sa eskwelahan bangod ini ang masarangan sang mga principal nga sila lang.
Magapadayun naman ang briefing sa mga manunudlo kag ang pagtraining sa mga ini sa paggamit sang modules.
Ginalantaw naman ni Sales nga kun madayun ang pagbukas sang klase sa Oktubre 5, mangin kadungan naman ini sa pagselebrar sang World Teacher’s Day.
Ginalantaw naman nga mahimo man nga mag-extend ang pagpagamit sa mga eskwelahan bilang mga facility quarantine.
