Suportado sang spokesperson sang Department of Education (DepEd) Regional Office 6 nga dapat disente ang ginasuksok sang mga kabataan nga mga bayo padulong sa eskwelahan bisan wala ginarequired ang uniform.
Sa interview sang Bombo Radyo Bacolod kay Hernani Escullar Jr., apisar nga indi man required ang pagsuksok sang uniform kinahanglan nga disente sa gihapon nga bayo ang ipasuksok sang mga ginikanan para sa ila nga mga kabataan.
Suno kay Escullar, sa idalom sang Deped order 65 series of 2010, ang mga estudyante ang mahimo makasuksok sang masunod kun wala sang uniform, sa mga lalaki, Polo shirt/T-shirt with sleeves ,plain color, nga may minimum nga printa; delargo ukon malaba nga short kag bisan ano nga duag, bisan ano nga footwear samtang sa mga babayi, mahimo magsuksok sang dress ukon bestida, skirt kag blouse, blouse kag delargo nga bisan ano nga color kag bisan ano man nga footwear.
Suno kay Escullar, wala man ginpahayag ni Department of Education Secretary Vice President Sara Duterte kun tubtob san-o nga indi required ang mga estudyante nga indi mag-uniform magluwas nalang kun may yara na sang ipagwa nga iban nga department order ang Deped nga required na ang uniform.
Suno sa public information officer sang Deped region 6, tuman kadako ang mabulig sini sa mga ginikanan nga tuman kapigado kaangay lamang sang haluson na makakaon sa isa kaadlaw kag naagyan pa sang COVID pandemic.
