Preparado na ang deployment sang mga kapulisan sa probisya sang Negros Occidental para sa nagahilapit nga pagbukas sang klase.
Sa interview sang Bombo Radyo Bacolod kay Negros Occidental Police Provincial Office spokesperson Police Captain Judesses Catalogo, preparado na ang Oplan Balik Eskwela 2025 security coverage.
Ang NOCPPO ang natalana magdeploy sang masobra 514 nga polce personnel para sa pagbukas sang klase.
May-ara sang iplastar nga police assistance desk sa mga eskwelahan nga plastaran sang duha ka pulis, may-ara man sang mobile patrols nga ihamtang sa mga strategic areas.
Magluwas sa kapulisan, may maga-augment man nga force multiplier, tanod kag volunteers.
Samtang may-ara man sang foot patrol nga magalibot agud maseguro ang safety sang mga manunudlo, kabataan kag ginikanan sa pagbalik sang klase.
Pahayag ni Catalogo nga may mga hitabo na sadto nga may mga nagasulod sa eskwelahan nga may malain nga tinutuyo kag ginatake-advantage ang kadamuon sang tawo.
Pinaagi sa presensya sang kapulisan, ginalantaw nga mapunggan ang ano man nga kriminalidad.
