Kaangay lamang ang deployment plan sang Bacolod City Police Office subong nga mass oathtaking kag inauguration sang mga elected Bacolod City Officials sa nangin deployment sa State of the City Address (SOCA) ni outgoing Mayor Alfredo ‘Albee’ Benitez.
Sa interview sang Bombo Radyo Bacolod kay Police Major Elmer Bonilla, station commander sang Bacolod Police Station 4, sakop sang ila nga jurisdiction ang Bacolod City Government Center.
Alas-2:00 pa lamang kaina sang hapon, gindeploy na ang mga police personnel nga magabantay sa palibot sang BCGC.
Magluwas sa ila, nag-augment man sang personnel ang nagkalainlain nga police stations kasubong man ang mga mobile patrol units kag explosive ordnance disposal and canine-unit, luwas pa sa mga traffic enforcers.
Suno kay Bonilla, ginapaabot nila nga amo gihapon ang crowd nga magakadto kaangay sa SOCA, apang kun mangin maayo ang tiyempo indi kaangay sa nakaligad nga nag-ulan, mahimo nga mas madamo ang magatambong sa karun nga mass oathtaking kag inauguration nga nagsugod subong nga alas-4:00 sang hapon.
Kadungan sini, alas-4:00 subong nga hapon man ginsuguran ang mass oathtaking kag inauguration sang mga elected officials sa Negros Occidental Provincial Government, nga ginpatigayon naman sa Negros Occidental Provincial Capitol.
