Nakahanda na ang Police Regional Office 6 para sa deployment sang mga kapulisan agud magpasiguro sang kalinong kag katawhay sa bug-os nga rehiyon sang Western Visayas.
Sa interview sang Bombo Radyo Bacolod kay Police Brigadier General Leo Francisco, regional director sang Police Regional Office 6, napreparahan na sang mga ini ang mga aktibidades nga patigayunon sa rehiyon kun sa diin kalakip diri ang pagbutang sang dugang nga mga kapulisan sa mga lugar nga ginapadulungan sang madamo nga mga tawo kaangay lamang sang mga terminals, simbahan kag tourists destinations.
Suno kay Francisco, magaumpisa ang deployment sa Sabado, Abril 1, sang mga kapulisan nga magabantay kag magapabilin sang kalinong kag katawhay samtang ginaobserbar ang semana santa.
Nagpanugyan man ang regional director nga siguruhon nga nasecure ang balay antes nga maghalin padulong sa simbahan ukon sa mga tourists destinations subong nga semana santa kag sa kun magbakasyon itugon sa mga kaingod nga wala ang mga ini sa ila balay agud nga may pamangkutan ang mga kapulisan sa tion nga may matabo samtang wala ang mga tagbalay.
Ginpahayag man ni Francisco nga may yara man sang designated police help desk sa mga simbahan sa tion nga kinahanglan sang mga ini sang bulig.
