Ginalantaw nga depression tuga sang personal nga problema ang motibo sang tiyo sa pagbuno patay sa iya hinablos kag pagsunog sang kaugalingon nga balay nga nagresulta man sa iya kamatayon sa Don Juan Subdivision, sa Brgy 2, San Carlos City, Negros Occidental, kahapon, Disyembre 14 sang aga.
Ang biktima ang isa ka 14 anyos nga lalaki samtang ang suspek ang iya nga tiyo nga ginkilala nga si alyas Raymond, 34 anyos, lunsay mga residente sang Laurel St., Don Juan Subd., Brgy. 2, San Carlos City.
Sa interview sang Bombo Radyo Bacolod kay Police Captain Rodney Sarona, deputy chief of police sang San Carlos City Police Station, santo sa ila nga imbestigasyon hinali lamang nga ginsulod sang suspek ang biktima nga nagahigda sa kwarto kag ginbuno ini sa liog sang makapila ka beses.
Gilayon naman nga nagtawag sang kapulisan ang ila nga pamilya.
Santo naman sa pahayag sang mga himata sang biktima, ang tiyo ang nagsaka sa ikaduha nga panalgan sang balay kag nagpanirado kag wala na magwa pa.
Didto na kag hinali nga nag-ibwal ang kalayo.
Ginalantaw nga bangud sa depression nga tuga man sang personal nga problema ang rason kun ngaa ginpatay sang suspect ang iya hinablos.
Antes paman ang insidente, nahibaluan nga may indi na paghangpanay sa tunga sang suspect kag biktima.
Ginatun-an naman sang San Carlos City Fire Station ang anggulo sang arson sa nagluntad nga sunog.
Sa interview sang Bombo Radyo Bacolod kay Fire Chief Inspector Erwin Johannes Gimotea, fire marshal sang San Carlos City Fire Station, sa ila nga imbestigasyon nakita basi sa fire origins ang indikasyon nga hungod ang pagsunog sa balay.
Suno diri, antes pa man natabo ang sunog ang suspek ang nagpangayo sang gasolina sa iya nga utod.
Ini man ang ginbasehan nila sa paglantaw nga ginhungod ang natabo nga sunog.
Nagapati ang mga fire personnel sang San Carlos City Fire Station nga ginbasyahan sang suspek ang ikaduha nga panalgan sang balay sang gasolina kag ginsindihan antes pa man ini nagbitay sang kaugalingon bangud sa nakita nga higot sa iya nga liog.
Wala naman sang iban nga nasamaran magluwas sa iloy sang suspek nga nakaagom sang lagob matapos gingapos ang suspek sang makita nga ginbuno sini ang iya nga hinablos.
