Ginpasalig sang provincial election supervisor sang Negros Occidental nga nakahanda na ang mga ini upod sa iban pa nga ahensya nga gindeputize sang gobyerno sa pag-umpisa sang local campaign period nga naga-umpisa subong nga adlaw.
Suno kay Atty Roberto Salazar, antes paman mag-umpisa ang campaign period para sa National Electove Positions, ang Comission on Election (Comelec) ang nagpatigayon na sang mga meeting kaupod ang Philippine National Police (PNP), Armed Forces of the Philippines (AFP) kag iban pa nga mga ahensya nga gindeputize sang gobyerno agud nga maseguro ang kahilwayan sang eleksyon tubtob sa Mayo 9.
Nagpatigayon man ang Comelec sang mga Candidate Forum kag Briefing agud nga mahatagan ang mga ini sang ihibalo sa kun ano ang mga pagsulundan sang ahensya may kaangtanan sa pagkampanya.
Suno kay Salazar, target sang mga ini nga safe kag secure ang tanan sa pagpadulong sa mga presinto sa adlaw sang piniliay.
Nakaplastar naman ang mga pagsulundan nga ginpagwa sang Comelec kag nagalaom nalang ang mga ini nga masunod.
Tinutuyo sang mga pagsulundan nga matapos ang eleksyon nga wala sang COVID-19 outbreak.
Apisar nga Alert Level 2 ang Negros Occidental kag Alert Level 1 ang Bacolod City, pahanumdom ni Salazar nga indi dapat maghatag sang tyansa bangod mangin mabudlay kun kadungan sa eleksyon nagadata ang kaso sang COVID-19.
Ginapasalig naman sang Comelec, upod sa PNP kag AFP nga seguruhon sang mga ini ang malinong kag matawhay nga palaabuton nga eleksyon.
