Nagasuporta ang Deputy Administrator for Regulation sang Sugar Regulatory Administration (SRA) sa deklarasyon ni President Ferdinand Marcos Jr. nga illegal ang Sugar Order No. 4 nga nagapahanugot sa importasyon sang 300,000 metric tons sang kalamay.
Sa interview sang Bombo Radyo kay Atty. Guillermo Tejida III, bilang pinuno sang Deputy Administrator for Regulation sang SRA, siya ang nagapamuno sa implementasyon sang sugar order lakip na ang pagmintar sang demand kag supply.
Suno sa iya, wala gid nagkonsulta ang management sa mga deputy administrators tuhoy sa Sugar Order No. 4.
Suno sa iya, antes magpagwa sang sugar order, ginadeterminar anay ang demand kag supply.
Kun makit-an nila nga manubo ukon negatibo ang supply, ila ginarekomendar sa management nga kinahanglan ini i-address kag igakonsiderar ang importasyon sang kalamay.
Apang suno sa iya, ang SO4 ang wala nag-agi sa management scrutiny kag daw kaangay nga gindali-dali sang sugar board.
Suno diri, wala man sila nakahibalo kun paano nagcome-up ang sugar board sa 300,000 metric tons nga kinahanglan i-import.
Aminado ini nga may mga bayolasyon ang mga opisyales sang SRA kag sila nga mga empleyado ang maga-expose sini sa nagakaigo nga tion.
