Aminado ang Deputy Administrator for Regulation sang Sugar Regulatory Administration (SRA) nga may kakulang sa supply sang kalamay kag nagakinahanglan sa gihapon nga mag-import apisar nga nagsugod na ang milling season.
Sa interview sang Bombo Radyo kay Atty. Guillermo Tejida III, ang pagsugod sang milling ang wala nagagarantiya nga may yara sang nagakaigo nga supply sang kalamay sa pungsod.
Suno sa iya, ang igaproduce nga raw sugar sang lima tubtob anum ka mga mills nga nagsugod na galing ang indi supisyente agud iconvert sa refined sugar.
Suno kay Tejida, kinahanglan gid nga mag-import sang kalamay kag tanan nga players sa sugar industry ang magakomporme nga may kakulang gid sa supply.
Suno sa iya, sang Agosto 7, may yara sila sang negative 50 percent sa supply sang raw sugar kag negative 27 percent sa refined sugar.
Naga-isa ini sa industriya sa pagpahayag nga may gap gid sa supply sang kalamay kag kinahanglan nga mag-import apang dapat ikonsiderar ang volume kag timing.
Suno diri, santo sa rekords sang SRA, nagasaka ang presyo sang kalamay sa karun bangud sa kakulang sa supply.
Apisar nga may nagahambal nga madamo sang stock sa warehouse, ginpahayag sini nga posible nga nabook ukon dedicated na ini para sa industrial kaangay sang mga nagahimo sang soft drinks.
Gindugang man sini nga sang bulan sang Hulyo, sila nga mga deputy administrators ang nagpropose nga mag-import sang 155,000 metric tons sang kalamay kun sa diin ang 55,000 metric tons ang magakadto sa local market ukon sa mga groceries samtang ang 100,000 metric tons ang pagatungaon naman sa industrials kag ang bilin ang igabalik sa local market agud ma-address ang gap apang suno kay Tejida, posible nga wala ini nakalab-ot sa ihibalo sang Presidente.
