Nagalaom ang Deputy Administrator for Regulation sang Sugar Regulatory Administration (SRA) nga pamatian sang House of Representatives ang version sang mga empleyado sa committee briefing sang Committee in Agri and Committee on Good Government tuhoy sa Sugar Order No. 4 nga patigayunon subong nga adlaw.
Sang Lunes, una na nga nagpatigayon sang committee briefing ang House of Representatives pinaagi sa Zoom kun sa diin ginduso ni Congressman Joseph Paduano nga himuon nga inquiry ang hearing kag magasugod ang formal inquiry sa masunod nga semana apang magapatigayon liwat sang briefing subong nga adlaw.
Sa interview sang Bombo Radyo kay Atty. Guillermo Tejida III, ang interes nila nga mga deputy administrator kag mga empleyado amu nga depensahan ang industriya kag ijustify ang mga sweldo nga ila nagakabaton nagikan sa gobyerno.
Nagalaom si Tejida nga mapamatian man ang ila punto sa Sugar Order No. 4 nga wala ini nag-agi sa nagakaigo nga proseso kag luyag sini nga mismo ang Presidente ang makabati sini nagikan sa ila.
Suno sa iya, may yara man sang discrepancies sa Sugar Order No.3 bangud may mga shipments sa idalum sang mando nga kapin 800,000 bags sang kalamay ukon 30,000 metric tons nga wala pa nakasulod sa border sang Pilipinas apang may yara na sang board resolution.
Suno diri, wala pa nakasulod sa border sang Pilipinas ang nasambit nga mga bags apang ginahambal sang sugar board nga ini ang nainspect na kag sarang nga gamiton sa domestic.
Nagapakita lamang ini suno sa iya sang korapsyon kag nagakadapat lamang nga mahibaluan sang Presidente kag sang publiko.
Suno kay Serafica, may bayolasyon ang mga opisyales kag sila nga mga empleyado ang maga-expose sini gani nalaom sila nga mapamatian sang chief executive kag sang publiko agud mahibaluan nga may mga empleyado kag deputy administators sang SRA nga wala nagapahanugot sang illegal nga mga aktibidad sang ahensya.
