Ginapasalamatan sang Deputy Administrator for Regulation sang Sugar Regulatory Administration (SRA) si anay SRA head Hermenegildo Serafica sa iya serbisyo sa industriya kag pagpamalakad sa ahensya.
Ini matapos nagpanaog sa pwesto si Serafica kadungan sang kontrobersyal nga Sugar Order No. 4.
Sa interview sang Bombo Radyo kay Atty. Guillermo Tejida III, ginpahayag sini nga antes paman ang pagresign ni Serafica, ila na ginakilala si Atty. Ignacio S. Santillana, ang Deputy Administrator for Research, Development and Extension Department, bilang officer-in-charge administrator sang SRA.
Apang sa karun nga opisyal na nga nagpanaog sa pwesto si Serafica, ila ginarespeto ang iya desisyon kag handa sila nga magsunod kun sin-o man ang igaappoint nga mangin masunod nga administrator.
Suno sa iya, nangin dako ang kontribusyon ni Serafica sa SRA apang tion na sa karun sang pagbag-o kag kinahanglan naman sang “fresh minds.”
Apisar nga wala pa sang may gindesignate nga administrator, nagpasalig si Tejida nga sila nga mga mga deputy administrators, nga ginalakipan sanday Atty. Santillana kag Atty. Brando Noroña, Deputy Administrator for Administration and Finance, ang magafunction a gihapon.
Wala naman sila nakibot nga nagpanawagan si Negros Occidental Fourth District Congresswoman Juliet Ferrer sa bilog nga miyembro sang SRA Board nga magresign bangud may madamo naman ang nagapanawagan nga maghalin sila sa pwesto.
Sa karun nagahulat na lamang sanday Tejida sang mandato kun sin-o ang mabulos nga administrator kag indi man sila maapektuhan bangud permanente ang ila position sa ahensya bilang civil servant.
