Ginatugyan na lamang ni Police Lt. Gen. Camilo Cascolan, Deputy Chief for Administration sang Philippine National Police (PNP), sa Special Investigation Task Group (SITG) ang pagpatigayon sang imbestigasyon kag ang paghatag sang pahayag tuhoy sa natabo nga helicopter crash sa San Pedro, Laguna.
Nahibalu-an nga sakay sa Bell 429 twin-engine rotary wing aircraft sanday PNP Chief Police Gen. Archie Gamboa kag iban pa nga mga opisyal sang PNP sang natabo ang aksidente.
Sa interview sang Bombo Radyo kay Cascolan, iya ginpahayag magapadulong subong nga adlaw sa landing site ang SITG nga ginapamunuan ni Police Maj. Gen. Guillermo Eleazar nga Deputy Chief for Operations sang PNP.
Suno kay Cascolan, antes sila magpagwa sang rekomendasyon kag analysis, may yara anay sang patigayunon nga occular inspection sa lugar nga ginluntaran sang aksidente.
Sa karon, nagalaum ini nga mangin estable na ang kondisyon nanday Director for Intelligence Police Major General Mariel Magaway kag Directorate for Comptrollership Police Major General Jovic Ramos nga naka-angkon sang patal nga pilas sa guya kag ulo kag lunsay yara karon sa kritikal nga kondisyon.
Ginkumpirmar man sini nga yara na sa maayo nga kahimtangan si Gamboa samtang under observation naman ang duha ka mga piloto.
Si Cascolan ang nagapungko karon bilang officer-in-charge sang PNP samtang wala pa naka-full duty status si Gamboa.
