Gin-athag sang deputy chief of police sang Victorias City Police Station nga wala gintayaan sang ila personnel sang armas-luthang si Cheryl Seranillo santo sa resulta sang ila nga imbestigasyon.
Sa interview sang Bombo Radyo Bacolod kay Police Captain Janus David, sang nakita nila sa facebook live sang Bombo Radyo Bacolod ang reklamo ni Seranillo batok sa ila personnel nga ginkilala sini nga si Police Executive Master Sergeant Johnny Maquilan, nagmando gilayon ang ila nga hepe nga magpatigayon sang imbestigasyon.
Suno kay David, ginpadulungan sang imbestigador ang Zone 4, crossing Mallorca, Victorias City agud nga hibaluon kag magtipon sang nagakaigo nga impormasyon kun matuod ang aligasyon ni Seranillo.
Suno diri, santo sa mga witness kag sa Barangay nga wala sang natabo nga pagpanaya sang pulis sang armas-luthang kay Seranillo kag wala man sang record ang Barangay.
Suno kay David, ang nakablotter lamang sa ila lugar amo ang komosyon nga natabo kun sa diin imbulbado sanday Agnes Escones, Cheryl Seranillo kag Rebecca Piscones kun sa diin gin-aresto si Seranillo.
Nagapanawagan man ang deputy chief of Police sang Victorias City Police Station nga bukas ang ila nga talatapan sa pagbulig kay Seranillo kag sa pagpablotter kun may yara sang kamatuoran ang aligasyon sini.
