Ginpaathag sang Deputy for Medical sa Bacolod Emergency Operation Center (EOC) nga pagapaboran ang positibo nga resulta sang RT-PCR test sang isa ka pasyente apisar pa nga magnegatibo ini sa iban nga molecular laboratory.
Aminado si Dr. Chris Sorongon, nga may mga hitabo gid man kun sa diin ang mga pasyente ang nagabuhat sang Molecular Laboratory (MoLab) hopping.
Ini ang pagpaidalum sa RT-PCR test sang mga pasyente sa nagkalain-lain nga laboratoryo tubtob sa makabatun sang luyag nila nga resulta.
Masami ini nga nagakatabo sa mga positibo ang RT-PCR test result, gani nagadangop ang mga ini sa iban nga ospital ukon swabbing center agud makakuha sang negatibo nga resulta.
Ginpaathag naman ni Sorongon nga ang kaangay nga insidente sa Bacolod Queen of Mercy Hospital kun sa diin nagdangop ang isa ka dialysis patient sa Bombo Radyo bangod sa positibo ini sa ospital samtang negatibo naman sa RT-PCR test nga ginpatigayon sa Bacolod Bays Center, ang naresolbar na sang EOC.
Suno kay Sorongon, ang asosasyon sang mga doktor sa Bacolod partikular na ang specialist sa Philippine College of Physician kag ang Philippine Society of Microbiology and Infectious Diseases ang naghuman sang resolusyon kag nagpagwa sang statement nga ang positibo nga resulta sang RT-PCR test ang magaprevail, apisar pa makakuha sang negatibo nga RT-PCR test result.
Ini ang ginsuportahan man sang EOC, gani paathag sang doktor nga tumanon gid sang mga ini ang protocols para sa mga nagpositibo.
Samtang paathag man ni Sorongon nga sa 72 oras, sarang na nga magbag-o ang resulta sang isa ka swab test result.
Suno sa doktor, ang timing sa specimen collection ang isa man sa factor nga makaapekto sa resulta.
Pahayag ni Sorongon nga sa tion nga nagpakuha sang RT-PCR test ang isa ka indibidwal, kag sa kaangay nga adlaw nagnubo man ang viral load sini, mahimo nga magnegatibo na ini makaligad sang tatlo ka adlaw.
Bangod sini, paathag sang doktor nga importante nga matumod ang agwat sa adlaw kag ang positibo nga resulta amo gihapon ang pagabatunon.
