Ginpasalig sang deputy head sang Bacolod Adventist Medical Center ang publiko nga safe kag hilway ang ospital apisar nga may yara ini sang reported cases sang COVID-19.
Sa interview sang Bombo Radyo kay Engineer Ferdinand Turbanos, aminado ini nga indi lipod sa ihibalo sang publiko nga may nagpositibo sa ila healthcare workers kag support team apang nagapasalig ini nga safe ang ospital.
Suno kay Turbanos, bangud sa mga reported cases, temporaryo nga ginsiraduhan ang ila outpatient department agud makapatigayon sang terminal disinfection.
Suno sa iya, ini agud indi matahap kag magkahangawa ang mga kliyente bangud nadisinfect ang ospital.
Suno diri, natapos na ang ila pagdisinfect sa mga clinics kag subong nga adlaw, ang emergency room naman ang tinluan gani temporaryo man ini nga ginsirad-an apang nagapadayon gihapon ang emergency services.
Suno kay Turbanos, nag-ubra sila sang temporaryo nga emergency room agud matatapan ang mga emerhensya kag sarang gihapon nga makakadto sa ospital ang mga pumuluyo.
Suno sa deputy head, sa 43 ka mga empleyado sang BAMC, 14 diri ang nagnegatibo samtang 28 pa ang pending ang resulta.
Suno diri, may yara sang walo ka mga empleyado nga na-infect sang virus sang tinalikdan apang lunsay asymptomatic ang mga ini kag yara sa maayo nga kahimtangan.
May yara man sila sang kaugalingon nga quarantine center nga separado sa ospital kag didto sa karun nakaconfine ang mga nagpositibo.
May yara naman sang apat ka mga pasyente nga positibo sa virus kag duha nga suspected case kag suno sa iya, may yara sang separado nga isolation room para sa mga COVID-19 patients, may yara man sang dedicated nurses kag doctors para sa mga ini, lain ang alagyan sang nasambit nga mga pasyente kag may kaugalingon man sila nga elevator.
Nagpanawagan man ini sa mga pumuluyo nga indi pag-idiscriminate ang mga healthcare workers kag frontliners bangud ginahimo nila ang tanan agud mabatuan sang komunidad ang virus.
