Magapangayo sang bulig ang banwa sang La Castellana sa national government agencies angot sa plano nga pagbag-o sang desinyo sang Tamburong Bridge sa Sitio Tamburong, Barangay Biak na Bato nga masami naga-awas kun may magluntad nga lahar flow gikan sa Bulkan Kanlaon.
Sa interview sang Bombo Radyo Bacolod kay La Castellana Municipal Disaster Risk Reduction and Management Office Head John de Asis, depleted na ang budget sang banwa kag indi na masarangan ang dako nga proyekto.
Plano nila nga makig-angot sa congressional office ni Negros Occidental 5th District Representative Dino Yulo, kasubong man sa Department of Public Works and Highways ukon sa Office of the Civil Defense.
Nahibaluan nga makaduha na nag-awas sa dalan ang lahar gikan sa Tamburong creek sang Hunyo nakaligad nga tuig kag sang nagliligad lamang nga inadlaw.
Ini bangod sa malapad ang suba, apang tuman ka gagmay ang tamburong nga alagyan sang tubig sa idalom sang taytay.
Bangod sa concentration sang lutak, nga may dala nga magagmay nga bato kag mga sanga sang kahoy, ini ang nagabara sa tamburong, nga nagaresulta agud mag-agwasa sa dalanon.
Bangod sini, plano nga ireconsruct ang taytay kag mapadakuan ang lulutsan sang tubig, agud indi basta basta magbara.
Samtang plano man nila magtukod sang dike sa kilid bangod sa pagtaas sang tubig, amat-amat man nga nagakapak-an ang duta sa kilid gani nagalapad ang suba.
Sa karun, ginahulat pa nila ang reply sang mga ginpalipat nga mahimo magpondo kag magpatigayon sang proyekto.
